Главные новости Рудного – Qostanai Media

Күз – тұмау сынды жұқпалы аурулардың өршитін мезгілі. Өйткені құбылмалы ауа райы иммундық жүйесі төмен азаматтарға бірден әсерін тигізеді. Осыған орай «ССКӨБ» АҚ өз қызметкерлеріне екпе жасата бастады

Коронавирустың қайталап соғу қаупі барлығымыздың қапысыз қалмауымызды ескерткендей. Тұмау мен бұл індет бірігіп кетсе, ауру одан сайын ушығып кетуі мүмкін. Ал екпе – қазіргі кездегі жұқпалы аурудан қорғанудың ең тиімді тәсілі.

Биыл «Евразия» медициналық орталығына 6 мың данадан аса «Инфлювак» вакцинасы әкелінді. Екпе жасатпас бұрын кен алыбының жұмыскерлері ПЦР-зерттеуден өтеді. Ол үшін кәсіпорынның әр бөлімшесінде орналасқан дәрігерлік пункттерде сынама тапсырады. Биоматериалдар зертханаға жіберіліп, бір тәулікте нәтижесі шыққан соң егу шаралары жүргізіледі. Барлық процедуралар тегін.

– Жасыратыны жоқ, көп ретте қызметкерлер екпе жасатуға бейжайлық танытып жатады. Яғни, олар бұл шараның көмегі аз деп ойлайды. Екпе салдырғандар да жиі тұмауратып жататынын дәлел етеді. Айтайын дегенім, екпе ауруды мүлдем болдырмайды емес, ол тек аурудың жеңіл өтуін қамтамасыз етіп, асқынудан сақтайды. Тұмауға қарсы екпенің күші 6 айдан 12 айға дейін әсер етеді, – дейді медорталық директорының орынбасары Юлия Аксютина.

Ауру айтып келмейді. Сондықтан күз-қыс маусымындағы эпидемиологиялық жағдайға «сақадай сай» тұру үшін екпе науқанын жіберіп алмайық.

Қуаныш ЕСҚАБЫЛ

газета «Рудненский рабочий»